O pasau mes, o diya 21 de febrero, se zelebró o Diya d’a Luenga Materna, adedicau a trucar o ficazio d’a perdida de luengas y d’a dibersidat cultural en o mundo. En Aragón, no somos mica foranos a ixa reyalidat. Asinas, somos una comunidat en a que uno de ixos diasistemas lingüisticos, o de l’aragonés, ye en grau pelingro. Ista situazión ye reflexada en documentos internazionals, como l’Atlas d’as Luengas Menazadas editau por a UNESCO, y europeyos, como a Carta Europeya d’as Luengas Minoritarias u Rechionals, feita por a Comisión Europeya, antiparti de en documentos autonomicos como a Lei de Luengas. A perdida d’ista luenga suposaría a perdida d’un riquizo patrimonio cultural, mirallo a la suya begada d’a nuestra istoria y mesmo idiosincrasia. As estruturas de pensamiento propias y asoziadas a iste idioma se cazegarían, tresbatindo asinas una graniza fuen de conoximiento y estudio.
Con tot y con ixo, a luenga aragonesa ye sofrindo d’una manca de dignificazión motibada por esferens ragons. Por un costau, una entibocada identificazión con o bulgar, reforzada por o enrastre e identificazión con o castellano d’Aragón. Por atro costau, un contino emplego politico d’a luega, muitas begadas ta enrestir-la.
Asinas, mientras o desembolique d’a campaña eleutoral t’as beniéns eleuzións a Reutor d’a Unibersidat de Zaragoza, la Asoziazión Cultural O Trango dezidió de prenzipiar una comunicazión con os candidatos a Reutor d’a instituzión con a fin de conoixer aquellas midas que a Unibersidat de Zaragoza lebaría a cabo ta aduyar en o prozeso de normalizazión da luenga aragonesa, con a respuesta positiba emitida por parti de l’autual Reutor y candidato en as beniéns eleuzións, Excmo. Sr. D. Manuel López Pérez, que se ha amostrau disposau a ascuitar as suyas proposas, afirmando que “he querido recoger vuestra inquietud y así en el apartado 7 (cultura) se indica: «Apoyo a las actividades culturales y académicas relacionadas con la identidad aragonesa»”.
De bez, o Reutor ha remerau a contribuzión que a Unibersidat de Zaragoza ha feito mientras o suyo mandato t’a normatibización d’a luenga aragonesa, con o rezién creyau Diploma de Espezializazión en Filolochía Aragonesa. Pero, a penar de que ista aizión suposa un gran trango t’a dignificazión y estudio d’ista luenga en periglo, a Unibersidat de Zaragoza, como instituzión neutral y de referenzia cultural, ye un organismo clau que podría ufrir una gran aduya t’a normalizazión y sozializazión d’a luenga aragonesa.
Por tot isto, ye de agradixer a adopzión de compromís d’o candidato Manuel López con a cultura y a riqueza lingüistica aragonesas asperando, asinas mesmo, que l’atro candidato, José María Gimeno Feliu, se prenunzie en o tocán a la luenga aragonesa.
.
